Кеше Орталық коммуникациялар қызметінде онлайн брифинг өткізген Денсаулық сақтау министрі Елжан Біртанов еліміздегі коронавирус пандемиясына қарсы қабылданған шаралар туралы баяндады.
«Кеше коронавирус жағдайына байланысты Үкіметте ведомствоаралық комиссияның отырысы өтті. Жалпы елімізде қазір 9300-ден астам адам коронавирус жұқтырған. Олардың жартысы, яғни 4600-ден астамы індеттен емделіп шықты. Өкінішке қарай, 37 адам қайтыс болды. Қазіргі уақытта 4653 науқас емделуде, олардың арасында 355 бала бар. Науқастардың 85%-ның жағдайы жеңіл деңгейде. Яғни олардың көбі симптомсыз тіркелген. вирус жұқтырғандардың 15-16%-ында ғана ауру белгілері болған. Ал 70%-ы симптомсыз тіркелген. Бұл науқастарды табу үшін Денсаулық сақтау министрлігі жергілікті әкімдіктермен бірлесіп профилактикалық скринингтік жұмыстарын жүргізіп жатыр. Президенттің тапсырмасымен қазір скринингтің көлемін тәулігіне 25 мың тестке арттырдық. Жалпы осы эпидемия басталғаннан бері елімізде 711 мың тест жасалды. Олардың 260 мыңнан астамы, яғни 40%-ы профилактикалық скрининг деп айтуға болады», деді Денсаулық сақтау министрі.
Министр тест арқылы ауруы анықталып, еш симптомы байқалмаған кейбір азаматтар ауруханаға жатуға көнбей жатқанын да айтып өтті.
«Симптомсыз науқастар басқаларға инфекцияны жұқтыруы мүмкін. Бұрын біз оларды ауруханаға жатқызғанбыз. Қазір мүмкіндік болса, үйлерінде немесе арнайы карантиндік стационарларға жатқызып, басқа адамдардан бөлектеуіміз қажет. Кейбір мемлекетте бұл науқастар жалпы статистикаға кірмейді. Біздіңше бұл дұрыс емес. Қазақстандағы тәртіп бойынша барлық науқасты есепке аламыз», деді.
Халықаралық және отандық сарапшылардың пікірінше, пандемия әлі аяқталған жоқ, толқынды жағдаймен келе жатыр. Яғни карантиндік жағдайда төмен түседі, бірақ шектеу шараларын тоқтатса қайталанады. Осыны айтқан спикер Қазақстанда ғана емес, дүние жүзінде осындай қауіпті жағдай сақталып отырғанын атап өтті.
«Пандемияны тоқтату үшін әр мемлекет, әр азамат карантиндік-санитарлық шараларды енгізуі және сақтауы қажет. Біріншіден, жұмыс орнында және сыртқа шыққанда 2 метр қашықтықты сақтау қажет. Сондай-ақ эпидемияны тоқтату үшін қазіргі уақытта маска тағу өте маңызды. Одан кейін жеке гигиена. Ауру тек қана ауамен емес, қол арқылы да жұғуы мүмкін. Сондықтан қол жуу да өте маңызды мәселе болып тұр», деді ол.
Министр қашықтан жұмыс істеудің тиімді екенін айтып өтт.
«Көп науқас жұмыс орнында ауырғандықтан қазір біз бас санитарлық дәрігердің қаулысымен жұмыс орындарындағы азаматтардың санын азайтуымыз қажет. Мүмкіндік болса, интернет арқылы қашықтан жұмысқа көшуіміз керек. Мысалы, кеңсе қызметкерлерінің 50%-ы қашықтан жұмыс істеуі тиіс. Азаматтар арасында қашықтық сақталса, инфекцияның таралуы тоқтайды. Кей кәсіпорын вахталық режімде жұмыс істейтіндіктен, мұндай шектеу енгізу қиын. Сондықтан бұл кәсіпорындар өте қатаң санитарлық және дезинфекциялық шараларды қабылдауы тиіс. Соңғы аптада рейд жүргіздік. Көптеген кәсіпорында санитарлық шаралар қабылданбаған. Бұл – халықтың денсаулығы үшін қауіпті. Үкіметтің ведомствоаралық комиссиясының шешімімен санитарлық шараларды енгізу және оны сақтауға мән беріледі. Сақтық шараларын қатаң ұстансақ қана инфекцияны тоқтата аламыз», деді Біртанов.
