"АЛҒАШҚЫ МЕДАЛЬ": ЕЛДОС СМЕТОВ ТОКИО ОЛИМПИАДАСЫНЫҢ ҚОЛА ЖҮЛДЕГЕРІ АТАНДЫ

Уақыты: 2021-07-25 Көрлімі: 446 Сипаттама

Дзюдодан Қазақстан командасының үздігі Елдос Сметов Токио Олимпиадасының қола жүлдег...

1627122558.jpg

Дзюдодан Қазақстан командасының үздігі Елдос Сметов Токио Олимпиадасының қола жүлдегері атанды деп  Olympic.kz-ге сілтеме жасап хабарлаймыз. 

60 келі салмақта сынға түскен Елдос кіші финалда Нидерланд өкілі Торнике Цакаджоені жеңді. Жеңімпаз қосымша уақытта анықталып, Елдос "ваззари" ұпайын иеленді. 

Осылайша, қазақстандық дзюдошы Токио Олимпиадасының қола медалін иеленіп отыр. 

Токио ойындарында Елдос Сметов алдымен Түркия, кейін Оңтүстік Корея балуанын жеңді. Олимпиаданың жартылай финалында жапониялық спортшы, үш дүркін әлем чемпионы Наохиса Такатоға қосымша уақытта есе жіберді. 

Қола медаль үшін өткен кездесуде Елдос бар күшін салып, Қазақстан қоржынына Токио ойындарындағы алғашқы жүлдені салды. 

Сондай-ақ, Olympic.kz сайтына сұхбат беріп, екінші Олимпиададағы екінші медаліне қатысты ойымен бөлісті. Олимпиада жүлдегерінің айтуынша, ол Токио төрінен абыроймен оралу үшін бар күшін салған. 

«Шыны керек, мен қола емес, алтын аламын деп келдім. Рио Олимпиадасынан кейін татамиден алыстап кетпей, үлкен спортта қалуымның да бір себебі осы еді. Күмістен кейін алтын алғым келді. Еліміздің әнұранын шарықтатып, көк байрағымызды биіктен көруді армандадым. Сол үшін тынбай еңбек еттім де. Бірақ маған бұйырып тұрғаны қола жүлде екен.

Мен барымды салдым. Спортқа арнаған осынша жылдағы бар өнерімді, бар күшімді бүгін Токио татамиіне тастап шықтым. Бойымда күреске деген қандай қасиет болса, соның бірін де аяп қалмадым. Жартылай финалдағы жекпе-жекті көрдіңіздер. Өте тартысты өтті. Қайта-қайта шабуылға иек артып, қарсыласымды тұқыртуға тырыстым. Алайда, жеңіс бүгін менің жағымда емес екен. 

Иа, жапондық балуан Наохиса Такато менімен кездесуге финалдық белдесуге шыққандай дайындықпен келді. Оның финалға және оған дейінгі жекпе-жектерге қалай дайындалғанын көрдім. Жартылай финалға ерекше әсермен беттеді. Екеуміз талай мәрте кездесіп жүрміз. Бір-бірімізді жақсы білеміз. Бүгінгі белдесудің тым ұзаққа созылғанының себебі де осы.

2020 жылдың басында біз нағыз бабымызда болдық. Алайда, әлемдегі пандемия салқынын тигізді. Сегіз-тоғыз ай бойы бірде бір жарысқа қатысқан жоқпыз. Десе де, бұл күндердің бәрі артта қалды, қиындықтың бәрін жеңіп шықтық. Соған қуанамын. 

Ал келесі Олимпиада туралы не айтуға болады?  Париж Олимпиадасына бару-бармауым жайлы ештеңені кесіп айта алмаймын. Өте ауыр сұрақ. Маған әлі тынығып, денсаулығымды дұрыстау керек. Сіздерге көрінбегенмен, менің ғана жаныма бататын жарақаттар бар. Соларды емдеу керек. Жоғарыда айттым, менің арманым – Олимпиада алтынын алу. Міне, екінші Олимпиадада алтынға сынық сүйем жерден тоқтап отырмын. Мен алмасам ба, менің бауырларым, қазақ дзюдошылары Олимпиада чемпионы атанса, содан артық бақыт жоқ!

Жарыс мұнымен біткен жоқ. Әлі еліміздің намысын қорғайтын төрт балуанымыз бар. Соларға сәттілік, жеңіс тілеймін», - деді Сметов. 

Айта кетелік, Елдос Сметов 2014 жылғы Азия ойындарының жеңімпазы, 2015 жылғы әлем чемпионы және 2016 жылғы Рио Олимпиадасының алтын медаль иегері. 

ФОТО: Жеңіс Ысқабай, Қазақстан ҰОК

 


Пікір жазу
  • Қазақстаннан қандай елдерге ұшуға болады
    Салық кодексіне қандай өзгерістер енгізілген?

    Ұқсас тақырыптар