Трамптың әңгімесінен не ұғуға болады? Біріншіден, Трамп Зеленскиймен сөйлесіп, қақтығыс нүктелері бойынша ортақ көзқарас қалыптастырып, артынша Путинге хабарласуы тиіс еді. Логика бойынша солай. Алайда ол Путинмен бірінші сөйлесті және түйісетін нүктелерді анықтады. Яғни келіссөзге кедергі Зеленский емес, Путин болып келді.
Екіншіден, Трамптың постында арнайы өкіл Уиткофф жайлы айтылды. Уиткофф негізінен Таяу Шығыс бойынша арнайы өкіл еді, ал Украина бойынша арнайы өкіл Кит Келлогг болатын. Келлогг жайлы бір ауыз сөз жоқ. Соғысты аяқтауға қатысты нұсқаларды Келлогг ұсынады, бірақ ол туралы ештеңе айтылмады. Келлоггтың пікірі де, жұмысы да, осы уақытқа дейін өткізген кездесулері де қаншалықты маңызға ие екені түсініксіз болып қалды. Алдағы «Мюнхен қауіпсіздік конференциясында» ол Еуропа елдерімен кездеседі. Не айтарын көреміз.
Үшіншіден, бүгін «Рамштайн» кездесуі өтті. АҚШ-тың Қорғаныс министрі Пит Хегсет қатысты. Алғаш рет Рамштайн кездесуінде АҚШ Украинаға әскери көмек пакетін жарияламады. Хегсет АҚШ үшін негізгі бәсекелестік аймақ Қытай өңірі екенін айтты. Қазір АҚШ-тан Украинаға келіп жатқан қару Байден беріп кеткен қарулар. Ал Трамп қару беруді жалғастыра ма, жоқ па, ол жағы беймәлім. Қазір Байденнен қалған 4 млрд долларға жуық қаржы бар. Оны Трамп Украинаға бере ме, ол жағы да түсініксіз.
Трамп соғысты жылдам аяқтағысы келеді. Бірақ бұл Украинаның оккупациядағы аймағын Ресейдікі деп мойындауға итермелеу деген сөз емес. Жай ғана ұрысты тоқтату, кемі 4 жылға. Трамп «мен биліктен кеткен соң, ол екеуі қайта соғысса да өз еркі, бірақ мен билікте отырғанда соғыс тоқтауы қажет» деген позицияда. Ол алыс Еуропадағы соғысты немесе Таяу Шығыстағы Газаны басты мәселе санамайды. Израильді күшейтеді, қару береді және әскери операциясын қолдайды. Ол Нетаньяхумен ең бірінші ресми кездесу өткізіп, Израильдің курсын қуаттайтынын айтты. Алайда Украина бойынша белгісіздік басым. Ол үшін басты мәселе ішкі саясат, соның ішінде салықты реттеу және АҚШ үшін тікелей мәселе саналатын миграцияны шешу. АҚШ-тың тұрғындарына Еуропада не болып жатқаны қызық емес, бірақ оңтүстік шекарада не болып жатқаны қызық. Трамп сол тұрғыдан бұл қақтығыстарды жылдам арада тоқтатқысы келеді.
Трамп пен Зеленский сөйлесті. Олардың не айтқанын көреміз және алдағы келіссөздерді қараймыз, Мюнхен конференциясына көз жүгіртеміз, Еуропа елдерінің позициясын бағамдаймыз. Сосын тағы бір ой түюге болады.
https://t.me/paranoiakz телеграм арнасынан