МАҚПАЛ МЕЙІРБЕКҚЫЗЫ: Осыдан он жыл бұрын «31» арнаның «Замандас» деген бағдарламасының түсіріліміне қатыстық. Басты қонақ Мұхтар Шаханов болатын. Түсірілім кезінде екі жас жігіт үлкен адамды, үлкен ақынды қатты сынады. Үлкен адам үндемеді. Күрсінді де қойды. Сол екі жігіттің бірі – сіз. Қазір отызға келдіңіз. Осы уақыт ішінде қанша саясаткермен әртүрлі жағдайда танысып, әңгімелестіңіз ғой. Шахановқа көзқарасыңыз өзгерді ме?
ЕРБОЛАТ МҰХАМЕДЖАН: Мұхтар ағамыз әлемге әйгілі, қаншама халыққа қадірлі алпауыт ақын. Біз ол кісінің шығармашылығын сынауға құқығымыз жоқ. Шамамен 2006-2007 жылдары сіз айтып отырған бағдарламада ол кісі жастар белсенді емес, өз ойы жоқ деп қайта бізді сынады ғой. Содан біз де жасымыз кіші болса да, өз ойымызды жеткізуге тырыстық. Біз Шахановқа «Жастарды емес, өздеріңізді өзгертіңіздер. Сол кезде біз сіздерге қарап бой түзейміз»,- дедік.
МАҚПАЛ МЕЙІРБЕКҚЫЗЫ: Саясаттағы бой түзейтін ағаларыңыздың кімдер екенін білетін сияқтымын. Сіз қарсы болмасаңыз, сәл кейінірек оларға да тоқталамыз. Әңгімеңізді жалғастыра беріңіз…
ЕРБОЛАТ МҰХАМЕДЖАН: … Біз Мұхтар ағаны сынады дегеніңізге келіспеймін. Керісінше біз пікірімізді жанашырлықпен білдірдік.Ағамыз кейбіреулердің саяси құралы болып кетпегенін қаладық. Әрине жастық максимализм болғанын да мойындаймын. Бірақ кейін бағдарламадан шыққан соң да есімде болса ағамызбен жақсы сөйлесіп, ол кісі біздің тек жақсылықпен айтқанымызбен келісетінін айтқан болатын. Одан кейін де Мұхтар ағамызбен талай кездестік, сөйлестік. Мемлекеттік тілді қорғау бойынша шараларға да белсенді қатыстық.
МАҚПАЛ МЕЙІРБЕКҚЫЗЫ: Кейбіреулер деген есімдік сөзін ашып айтайықшы. Жеке тет-а-тетте Сіз Мұхтар мырзаның Жармахан Тұяқбаевтар басқаратын ЖСДП партиясының жиындарына қатысып, олармен жақсы араласып жүргені ұнамайды дедіңіз.
ЕРБОЛАТ МҰХАМЕДЖАН: Тұяқбаевтар көп адамды пайдаланған сияқты. Әсіресе жастарды. Біраз жастар максимализммен сол кісінің артынан ерді. Қазір қайда жүр, ол кісі? Партиясы бар ма? Мені осы сұрақ мазалайды.
МАҚПАЛ МЕЙІРБЕКҚЫЗЫ: Біздің елде ешқандай оппозициялық партия жоқ. Бұл норма ма?
ЕРБОЛАТ МҰХАМЕДЖАН: Норма емес. Бірақ, бірнәрсені нақтылап алайық. Жеке өзім саяси мәселелерге жолағым келмейді. Өйткені, аға буын саясаткерлерге аса сенім менде жоқ. Сонда да сіз сұрақ қойған соң жауап берейін: Бәлкім, «Ақжол» партиясы сол бағытқа жақын жұмыс істеп жатыр.
МАҚПАЛ МЕЙІРБЕКҚЫЗЫ: Қазіргі «Ақжолдың» оппозициялық партияға үш қайнаса да сорпасы қосылмайтын сияқты. Төрағасы «біз демократиялық партиямыз» дегенін естігенмін. (Өкінішке қарай, ол кісі соңғы жылдары журналистерге көп сұхбат бермейтін болды. Әйтпесе, Азат Перуашевқа да қойылатын сұрақ көп еді.)
ЕРБОЛАТ МҰХАМЕДЖАН: Ол сіздің көзқарас. Бірақ, «Ауыл», «КХДП» сияқты сайлау кезінде ғана оянатын партияларға қарағанда Азат Перуашевтың және Ақжолдан шыққан депутаттардың парламентте маңызды мәселелерді көтеруін байқаймыз. Сонымен қатар, мойындайтын жайт: қазіргі таңда партиялардан қарағанда тәуелсіз сарапшылардың, белсенді тұлғалардың халыққа да, билікке де сөзі өтімді. Бір тұсынан олар барда оппозициялық партиялардың қажеті бар ма деген де ой туындайды.
МАҚПАЛ МЕЙІРБЕКҚЫЗЫ: Партиялардың, партиялардан парламентке өткен депутаттардың миссиясын қоғам белсенділері тегін атқаруы әділетсіздік емес пе? Өз басым, Парламенттегі қала, көше, мекеме аттарын ауыстыруға асығатын кейбір депутаттардың орнына қоғам белсенділерінің отырғанын қалаймын. Бірақ ол үшін жаңағы қоғам белсенділері үш партияның біреуіне мүше болуы қажет қой?
ЕРБОЛАТ МҰХАМЕДЖАН: Сіздің айтып отырғаныңыз бір жағынан дұрыс шығар. Бірақ өмірге реалды қарауымыз керек. Менің білуімше қазіргі таңда қоғам белсенділерінің көбісі арнайы тапсырыспен де жұмыс жасайды, яғни олар тегін жұмыс істемейді деген сөз. Десек те партиялардың, министрліктердің оянуына қоғам белсенділері ықпал етіп отыр. Бұл факт.
МАҚПАЛ МЕЙІРБЕКҚЫЗЫ: Үлкен кісілердің ішінен Нұртай Сабильянов пен Бекболат Тілеухановты үлгі тұтамын деп «Айқын» газетіне сұхбат беріпсіз. Екеуі де Парламентте Шахановтан да ұзақ отыр. Депутат ретінде қызметтеріне көңіліңіз тола ма?
ЕРБОЛАТ МҰХАМЕДЖАН: Депутаттарды бағдарламамда ашық сынай беретінімді жақсы білесіз. Ал сіз айтып отырған азаматтардың әрқайсысын азаматтығы, адамгершілігі үшін бағалаймын. Нұртай Сабильянов бірінші рет парламенттік сайлауға түскенде, шамамен төртінші сыныпта оқып жүрдім. Дәулет Тұрлыхановпен қатар түсіп, жеңіліп қалды. Екінші ретінде де өте алмады. Бірақ сол аралықта ауылдарға көмектесуін тоқтатқан жоқ. Біз оқыған мектепке он бір компьютерді әкімдік емес, Сабильянов әкелген. Үшінші сайлауда парламентке өтті. Беріректе, ол кісінің қоғамдық көмекшісі болдым. Қанша жыл өтсе де Нұртай мырза өзгермеген, бір қалыпта. 
МАҚПАЛ МЕЙІРБЕКҚЫЗЫ: Депутат ретінде халық алдындағы міндетін мінсіз атқарып жатыр ма? Обьективтілігіңізді танытып, жауап беріңізші.
ЕРБОЛАТ МҰХАМЕДЖАН: Біз көп нәрсені сырттай ғана білеміз. Бүгінгі саяси жүйеде тиімді жұмыс атқарып отырған санаулы депутаттың бірі. Мәселен, Парламентте еңкөп хат сол кісіге келеді. Және бірде-біреуін жауапсыз қалдырмайды. Менің ойымша атқарып жатыр.
МАҚПАЛ МЕЙІРБЕКҚЫЗЫ: Қарағандыдағы оқиғаға байланысты араға апта салып, Абаевтан «неге мемлекеттік БАҚ алғашқы күндері үнсіз отырды» деп сұрақ қоймай, олардың анық ақпарат беруін бақылауды сұрағанын қалай қабылдадыңыз?
ЕРБОЛАТ МҰХАМЕДЖАН: Жай оқыдым да қойдым. Соншалықты бір әсер етпеді. Бірақ, Нұртай мырзаның журналистерді кінәлауы мүмкін емес. Себебі барлықжурналистпен жақсы араласады. Мүмкін, контексттен де алынған шығар. Қарағандыдағы жағдай кезінде елдестірмек мақсатта емес, арандатуды ойлайтын, хайп тұрғысында жеткізуді жақсы көретін жекелеген журналистерде бар емес пе?! Сол кісілердің ақпаратын көріп айтқан да шығар. Мүмкін мен қателесіп отырмын.
МАҚПАЛ МЕЙІРБЕКҚЫЗЫ: Нұртай ағалар сол күні Қарағандыға барып, оқиғаны өз көзімен көріп, халықпен сөйлесіп болған соң ғана жекелеген журналисттерді кінәласа ешкім ешнәрсе дей алмас еді. Бірақ депутаттардың сол күні халықпен бірге болғанын естіген жоқпыз. Барғандары жөн еді ғой? Келісесіз бе?
ЕРБОЛАТ МҰХАМЕДЖАН: Келісемін.
МАҚПАЛ МЕЙІРБЕКҚЫЗЫ: Неге бармады деп ойлайсыз?
ЕРБОЛАТ МҰХАМЕДЖАН: Оны мен білмедім. Өзінен сұрасаңыз дұрыс болады.
МАҚПАЛ МЕЙІРБЕКҚЫЗЫ: Шахановты жиырма жасында көптің көзінше сынаған Ерболат неге қазір интервьер бола тұра, үлгі тұтатын ағасына осындай ыңғайсыз сұрақ қоймайды?
ЕРБОЛАТ МҰХАМЕДЖАН: Мен Шахановты сынамағанымды, тек өз пікірімді білдіргенімді тағы да қайталап айтамын. Ал Нұртай мырзаның Қарағандыға баруы керек болған шығар. Иә, бұл ойыңызбен келісемін. Бірақ не себептен бармағанын тап басып айта алмаймын. Бәлкім, еңбек демалысында болған шығар. Шынымды айтсам маған қызық та емес. Бірақ сіз үшін, алдағы уақытта Нұртай Сабильяновты бағдарламама шақырып, дәл осы сұрақты өзіне қояйын….
МАҚПАЛ МЕЙІРБЕКҚЫЗЫ: Мен үшін емес, көрермен үшін қойыңыз.
ЕРБОЛАТ МҰХАМЕДЖАН: Айтпақшы… Үлгі тұту дегенде, барлық жағынан сол кісілерді үлгі тұтамын деген сөз емес. Кез келген адамның жақсы қасиеттерін алуға тырысамын. Жаман қасиеті болса көзімді жұмамын.
ЕРБОЛАТ МҰХАМЕДЖАН: Жоғарыда Қарағандыдағы ереуілді үш күн бойы арналар көрсетпеді дедіңіз ғой. Біздің «Atameken Business» арнасы бірінші күннен бастап, жаңалықтардан хабарлады. Әріптестерім оқиғаны жан-жақтан талдап, сауатты сюжеттер дайындады.
МАҚПАЛ МЕЙІРБЕКҚЫЗЫ: Бекболат ағаны Сіз ғана емес, жастардың көбісі жақсы көретін сияқты. Себебін ойланып көрдіңіз бе? Ол кісінің жастарды өзіне тартатын қандай магниті бар?
ЕРБОЛАТ МҰХАМЕДЖАН: Меніңше, Қазақ жастары Бекболат мырзаның білімі, дүниетанымы, өнері, таланты үшін жақсы көреді. Ұмыт болған қаншама ән-жырымызды қайта тірілтті. Ұлттық спортты аяғынан тұрғызды. Бойынан қазақтыңбейнесін көргендіктен жанына тартылады деп ойлаймын.
МАҚПАЛ МЕЙІРБЕКҚЫЗЫ: Иә, Бекболат ағаның мықты әнші, өнерпаз екенін біз тұрмақ, тіпті, қарсыластары да мойындайтын сияқты. Ал ол кісі қандай депутат?
ЕРБОЛАТ МҰХАМЕДЖАН: Мықты депутат. Білім, мәдениет, кино саласының дамуына дәл Бекболат мырзадай атсалысып жатқан депутат аз шығар. Ұтымды ұсыныстар айтып, дұрыс заңдар қабылдатты.
МАҚПАЛ МЕЙІРБЕКҚЫЗЫ: «Азамат» бағдарламасында «қалада емес, өз ауылымда қызмет етем» деп жиі айтушы едіңіз. Осы жігіт шынымен ауылға барып, жұмыс істей ме, әлде пафоспен сөйлеп тұр ма деген сұрақ туған сол кезде. Шынымен, Үржар ауданы әкімінің көмекшісі болғаныңызды білемін. Алайда, Астанаға тез келіп қалған сияқтысыз?
ЕРБОЛАТ МҰХАМЕДЖАН: Жиі емес, бір-екі рет айттым. Екі жыл еңбек еттім. Бұл мерзім менің ойымша аз емес. Бердібек Сапарбаевтың өңір басшысы болып тұрған кезінде барып, Даниал Ахметов облыс әкімі болғанда Астанаға келдім. Аудан халқына пайдасы тиген біраз шаруаның ретін келтіруге көмегімізді тигіздік деп есептеймін. Ауданымыздағы 27 ауыл, 32 елдімекеннің барлығын аралап, проблемаларымен танысып, әкімге жеткізуге тырыстым. Шынымды айтсам, туған жеріме қызметке баратын жылы маған Маңғыстаудан басшылық статусындағы жалақысы жоғары қызмет ұсынды. Бірақ туған жерді таңдадым. Проблемасымен танысқым келді.
МАҚПАЛ МЕЙІРБЕКҚЫЗЫ: Журналистикаға қалай келдіңіз? Қанша уақытқа келдіңіз?
ЕРБОЛАТ МҰХАМЕДЖАН: 2013 жылдың күз айында «Қазақстан» телерадиокорпорациясының төрайымы Нұржан Жалауқызы мені он минуттықбағдарламаны жүргізуге шақырды.
МАҚПАЛ МЕЙІРБЕКҚЫЗЫ: Кастингсіз өттіңіз бе?
ЕРБОЛАТ МҰХАМЕДЖАН: Кастинг болған жоқ. Нұрмұхамед Байғараевтың (продюсер) ұсынысымен келдім.
МАҚПАЛ МЕЙІРБЕКҚЫЗЫ: Нұржан Жалауқызы Мұхамеджанованың сізге ешқандай жақындығы жоқ қой?
ЕРБОЛАТ МҰХАМЕДЖАН: Жақындығы бар. Апайым ғой. Әрине қалжың. Ең бірінші Қазақстан арнасына барғанда мені білмейтін көпшілігі туыстық қатынасы бар деп ойлаған екен. Фамилиямыз ұқсас. Ол кісі білікті басшы болды.
МАҚПАЛ МЕЙІРБЕКҚЫЗЫ: Ел арасында мемлекеттік арналарда еркіндік жоқ деген әңгіме тарап жүр. Сізге сол кездегі басшылық шектеу қойды ма?
ЕРБОЛАТ МҰХАМЕДЖАН: Ешқандай шектеу қойған жоқ. Ашығын айтсам, экономикалық контентті бақылауға алу қиын. Ұлттық арнаның тікелей эфирінде инфляцияның да, девальвацияның да себептерін ашық айта беретін едім. Соған қарағанда, мемлекеттік арналарда цензура жоқ деп ойлаймын.
МАҚПАЛ МЕЙІРБЕКҚЫЗЫ: Қазір ғана Қарағандыдағы оқиға туралы мемлекеттік БАҚүндемеді дедік. Бұл не сонда?
ЕРБОЛАТ МҰХАМЕДЖАН: Сирек қолданылатын цензура. Негізі, цензура жоқ. Себебі, өзім алдында айтқанымдай, мемлекеттік арнада жұмыс істедім. Төбемнен қарап тұрған адамды көрмедім.
ЕРБОЛАТ МҰХАМЕДЖАН: Меніңше, цензура журналистердің миында бар. Өздерін рамкаға салып қойған соң, ішінен шығу қиын болатын шығар. Мысалы тәуелсіз зерттеу жүргізуге, анализ жасауға ерінгендіктен болар. Журналистердің елу-алпыс пайызы солай жұмыс істейді.
МАҚПАЛ МЕЙІРБЕКҚЫЗЫ: Сіз көп жағдайда басшыларға түсіністікпен қарап, журналистерді сынайды екенсіз. Сөзімді дәлелдеу үшін цитатаңызды келтірейін. «Мемлекеттік арнаның журналистері,«Басеке, мен салалық журналистика, яғни, экономика, саясат, қаржы бойынша білімімді арттырғым келеді. Қосымша оқысам қалай қарайсыз?» -десе, Ерлан Қарин, Ринат Думанұлы сияқты кәсіби сарапшылықжағынан білімі жоғары азаматтар бұндай бастамаларға қарсы шықпас еді. Өкінішке қарай, бізде мемлекеттік және жекеменшік арналардағы жұмыс істейтін журналистердің көбісі нәпақаны ғана ойлайды». Бұл сіздің цитатаңыз. Сіз қарапайым журналистерді төмендетіп, басшыларға ұнағыңыз келе ме?
ЕРБОЛАТ МҰХАМЕДЖАН: Дұрыс түсінбегенсіз. Бірнеше жыл бұрын «Ұлттықкітапханада» өткен журналистерге арналған бір жиын өтті. Кәсібилік мәселесі көтерілгенде мемлекеттік арнадағы әріптестеріміз басшыларын кінәлай бастады. Сол кезде мен «Егер өздеріңіз Қаринге, Кертаевқа кіріп, бос уақытымда білімімді жетілдіруге байланысты ұсыныс айтсаңыздар, олар қарсы болмайды ғой», деп өз ойымды айттым. Егер журналист қосымша курстарға барып, білімін шыңдаса, оған кім қой дейді.
МАҚПАЛ МЕЙІРБЕКҚЫЗЫ: Жалақысының жетпіс пайызын пәтерақыға жарататын журналистке нәпақына ғана ойлайсыңдар деп кінә тағу әділетсіздік емес пе? Мүмкін, олар шығындарын жабу үшін қосымша жұмыс істеуге мәжбүр шығар? Олардың ақылы курстарға баруға қаражаты, уақыты, мүмкіндігі жоқ шығар? Ойланбадыңыз ба? БАҚ-тың басшысына «Сіздер неге қосымша ақша бөліп, қызметкерлеріңізді жұмыстан босатып, оқуға жібермейсіз?»- деп ешкім сұраққойғысы келмейді.
ЕРБОЛАТ МҰХАМЕДЖАН: Қосымша жұмыс істемесін деп мен айтпадым. Керісінше істесін. Ал енді неге міндетті түрде ақылы курстарға бару керек? Сіз белгілі бір сарапшыдан сұхбат алдыңыз делік. Кейін сол кісімен тағы бірнеше рет кездесіп жай әңгімелессеңіз курстың ең жақсы түрі болар еді деп есептеймін.
МАҚПАЛ МЕЙІРБЕКҚЫЗЫ: Журналистикада жүргеніңізге үш жыл болыпты. Кәсіби шеберлігіңізге бес баллмен есептесек, қанша қоясыз?
ЕРБОЛАТ МҰХАМЕДЖАН: Оған көрермендер, басшылығым және де әріптестерім баға берсін. Ал өзім әзірше орташа деген баға қоямын. Кәсіби шеберлік жылдар бойы қалыптасады. Журналистиканың сұхбат, аналитика жанрлары маған жақын. Алдағы 5 жылда кәсібилік немесе аналитика тұрғысынан Қазақстандағы мықты интервьюер болу үшін жұмыстар жасай беремін. Бірақ мен өзімді ешқашан журналиспін деп есептеген емеспін.
МАҚПАЛ МЕЙІРБЕКҚЫЗЫ: Мемлекеттік «Дарын» сыйлығын журналист болғаныңыз үшін берді ғой.
ЕРБОЛАТ МҰХАМЕДЖАН: Иә, журналист болғаным үшін. Екі жылдың ішінде 21 бір ірілі-ұсақты жүлде алыппын.
МАҚПАЛ МЕЙІРБЕКҚЫЗЫ: Кәсіби деңгейім орташа деп өзіңіз айтып отырсыз. Сонша жүлде экономикалық біліміңіз үшін ғана берілген бе?
ЕРБОЛАТ МҰХАМЕДЖАН: Қызық сұрақ екен. Жауабын білмеймін, оны конкурс комиссиясынан сұраған жөн. Бәлкім, тақырыпты сауатты талдағанымды бағалаған шығар. Ерболат Мұхамеджан екен деп бермегені анық.
МАҚПАЛ МЕЙІРБЕКҚЫЗЫ: Бағдарламаңызға лауазымды тұлғаларды жиі шақырасыз. Көбісінің көмекшілерін араластырмай, жеке номерін жазып аламын дедіңіз. Бәлкім, көмектескен шығар…
ЕРБОЛАТ МҰХАМЕДЖАН: Жоқ, комиссия мүшелері көп жағдайда кәсібилікпен қатар, талдауға баға береді. Қазіргі таңда журналистік біліміңді емес, сараптамалыққабілетіңді бағалайды.
МАҚПАЛ МЕЙІРБЕКҚЫЗЫ: Ал кәсіби журналисттер сізге қалай қарайды?
ЕРБОЛАТ МҰХАМЕДЖАН: Олардың қалай қарағанына қатты мән де бермеймін. Әртүрлі пікірлер айтылады. Бір күні өзім қатты сыйлайтын әріптес ағамыз қоңырау соғып, шығармашылығыма жоғары баға берді. Әр бағдарламаға мұқият дайындалып, фактімен, сандармен жұмыс істейтініңді байқадым дейді. Бірнәрсені нақты сеземін. Көрерменнің көкейіндегі ойды айтуға тырысамын. Шынтуайтына келгенде, маған көрерменнің пікірі маңызды. Себебі бірінші кезекте қоғамға қызмет етіп жатырмын деп есептеймін.
МАҚПАЛ МЕЙІРБЕКҚЫЗЫ: Көрерменнің пікірі маңызды деп отырсыз. Ал көрерменнің көпшілігі интернетте отыр. Ол платформада журналистерден гөрі блоггерлердің беделі басым. Ютубта сіздің бағдарламаңызды 1000 адам қараса, орыс тілді блоггерлердің видеосын 150 мың адам көреді. Сіз жұмыс істейтін арнаңызға 46 мың көрермен жазылса, блоггерлердің каналына 126 мың көрермен қосылған.
ЕРБОЛАТ МҰХАМЕДЖАН: Біздің арнаға бар жоғы 2 жыл ғана болды. 2019 жылға тамаша жоспарлар құрып отырмыз. Ал, авторлық “Басты тақырып” бағдарламамды бір блоггер тақырыбын өзгертіп өз каналына салыпты. Қанша адам қарағанын білесіз бе? 1 млн 300 мың. Егер мен ютубдың форматында еркіндікті шектен тыс пайдаланып бағдарлама түсіретін болсам, жоғары көрсеткішке жете аламын. Блогерлер біз сияқты күн сайын бағдарлама дайындамайды. Олар аптасына, айына бір жобаны асықпай түсіруге мүмкіндігі бар. Бірақ өзіңіз білетіндей, телеарнаныңформаты да, талабы да, тәртібі де басқа.
МАҚПАЛ МЕЙІРБЕКҚЫЗЫ: Лауазымды тұлғалармен жақсы араласын журналист ретінде тағы да бір сұрақ. Тимур Құлыбаевты танисыз ба? Ол кісінің Қазақстанға сіңірген еңбегін қалай бағалайсыз?
ЕРБОЛАТ МҰХАМЕДЖАН: Ол кісіні біздің елде танымайтын адам жоқ шығар. Қазақстанға сіңірген тамаша нәтижелі еңбегі ретінде «Атамекен» Ұлттықкәсіпкерлер палатасын құруы деп айтар едім.
МАҚПАЛ МЕЙІРБЕКҚЫЗЫ: Сіз жұмыс істейтін арна Атамекен ҰКП-ға серіктес пе, жоққарамағандағы компания ма?
ЕРБОЛАТ МҰХАМЕДЖАН: Серіктеспіз.
МАҚПАЛ МЕЙІРБЕКҚЫЗЫ: Осы жылы бірінші хабарыңызға Қайырбек Арыстанбековты шақырып, «Қазақстанда биыл дағдарыс бола ма?» деген сұраққойдыңыз. Қайырбек аға екіүшты жауап берді. Сіз қалай ойлайсыз? Марғұлан Сейсембаевтың сөзінің жаны бар ма?
ЕРБОЛАТ МҰХАМЕДЖАН: Жеке пікірім, дағдарыс болмайды. Экономикалық теория бойынша Ішкі жалпы өнімнің нақты өсімі алты ай бойы минусқа кетіп, жетінші айдың бірінші күнінде бірге көтерілсе, дағдарыс болмайды. Қазір біздің көрсеткіш + 4 үстінде. Бірден түсіп кете қоймаспыз.
МАҚПАЛ МЕЙІРБЕКҚЫЗЫ: Мұнайдың бағасы бұдан ары төмендей берсе…
ЕРБОЛАТ МҰХАМЕДЖАН: Айтып отырмын ғой. Бізде дағдарыс келсе де, болғызбайды (күлді).
МАҚПАЛ МЕЙІРБЕКҚЫЗЫ: Қазақстанда отбасылық орташа жалақы 500 мың теңге дегенге келісесіз бе?
ЕРБОЛАТ МҰХАМЕДЖАН: Президентке қате ақпарат жеткізілген сияқты. Барлықөңірде отбасының орташа жалақысы 500 мың теңге емес. Және Президенттің осы сөзінен облыс, қала әкімдері жалақының сондай болуына жұмыс жасауы тиіс деп ойлаймын.
БЛИЦ-СҰРАҚТАР:
– Қазақстандағы ең үлкен үш проблеманы атаңызшы?
– Ауыз су мәселесі, білім мен денсаулық сапасы, идеологиялық нақтылық жоқ
– Қазақстаннан бір рет болсын, кеткіңіз келді ме?
– Маған ондай ой келген емес.
– Астанадан кеткіңіз келді ме?
– Астанадан кеткім келмеді.
– Қазақстан тарихында ең мықты министр кім болды?
– Үш министрдің есімі есіме түсіп отыр. Жеңіс Қасымбек, марқұм Алтынбек Сәрсенбаев, Дәурен Абаев.
–Қазақстан тарихында ең мықты депутат кім болды?
– Бекболат Тілеухан, Нұртай Сабильянов, Омархан Өксікбаев,
–Қазақстан тарихында ең мықты әкім кім болды?
– Бердібек Сапарбаев
–Қазақ телевизиясы тарихында ең сапалы бағдарлама?
-«Қарекет» бағдарламасы
–Қазақстан тарихындағы ең мықты тележурналист?
– Марқұм Сағат Әшімбаев, Бейсен Құранбек.
МАҚПАЛ МЕЙІРБЕКҚЫЗЫ: Рахмет!
Дереккөз: 7kun.kz
