«Қылмыстық агрессия және егемендікке қол сұғу»:
АҚШ пен Израильдің жаппай зымыран соққыларынан кейін Иранның Сыртқы істер министрлігі әлемдік қауымдастыққа шұғыл үндеу жасады. Тегеран Біріккен Ұлттар Ұйымы мен Қауіпсіздік Кеңесін жағдайға дереу араласуға шақырып, Вашингтон мен Тель-Авивті елдің аумақтық тұтастығын өрескел бұзды деп айыптады.
Қатаң риторикадағы ресми мәлімдеме Иран дипломатиялық ведомствосының әлеуметтік желілерінде жарияланды.
«Қасиетті әрі өркениетті Иран жері АҚШ пен сионистік режим тарапынан тағы да қылмыстық әскери агрессияға ұшырады. Бүгін таңертең АҚШ пен сионистік режим... Иран Ислам Республикасы Біріккен Ұлттар Ұйымы мен Қауіпсіздік Кеңесін халықаралық бейбітшілік пен қауіпсіздіктің бұзылуына байланысты дереу шара қолдануға шақырады», – делінген министрліктің Telegram-арнасында таралған хабарламада.
Иран дипломаттары одақтастардың әрекетін халықаралық құқық нормаларына мүлдем қайшы келеді деп бағалады. Тегеран зымыран шабуылдары тек қарулы күштер нысандарына ғана емес, сонымен қатар бейбіт азаматтық инфрақұрылымға да жасалғанын ерекше атап өтті.
Иран СІМ бұл оқиғаны мемлекеттің ұлттық қауіпсіздігі мен саяси тәуелсіздігіне тікелей қауіп төндіру, қол сұғушылық деп бағалайтынын мәлімдеді. Дипломаттардың пікірінше, АҚШ пен Израильдің әскери операциясы БҰҰ Жарғысының күш қолдануға және егемен елдердің аумақтық тұтастығына қауіп төндіруге үзілді-кесілді тыйым салатын негізгі қағидаттарына толықтай қайшы келеді.
Qaz365.kz телеграм арнасынан
