Атыраудағы мұнай өңдеу зауыты тағы бір жаңа өнім шығаруды қолға алды. Бұл – «Аltay-45» қысқы дизель отыны. Атынан байқалып тұрғандай, -45С0 аязда қатпайтын дизельдің алғашқы партиясы сәтті шығарылды.
«АМӨЗ» ЖШС-нің қоғаммен байланыс қызметінің мәліметінше, соңғы жылдары зауытта шығарылатын өнім түрлері көбейе түсті. Өткен жылы Қазақстандағы ең төменгі температураға шыдамды «Khazar-38» дизель отынын өндіру басталған еді. Енді сондай өнімнің қатарына «Altay-45» қысқы дизель отыны қосылды.
– «Аltay-45» маркалы дизель отыны мұнайды терең өңдеу кешенінің Prime D 3205 дизель отынын гидротазарту қондырғысында шығарылды. Жаңа өнім K5 класының экологиялық талаптарына сәйкес келеді. Күкірттің минималды мөлшері және төмен температуралық қасиетін жақсартатын қоспалардың болмауы өнімді арктикалық дизель отынының сапасына сәйкес етеді. Жаңа дизель отынының бірінші партиясы ішкі нарықтағы сұранысты қамтамасыз ету үшін шағын көлемде өндіріледі. Одан әрі сұранысқа қарай «Altay-45» дизель отынын тиеу көлемі ұлғайтылатын болады, – деп хабарлады кәсіпорынның қоғаммен байланыс қызметі.
Аталған зауытта тағы бір жаңалық бар. Бұл – зауытта шығарылған жанармайдың REACH сертификатын иеленуі. Осыған байланысты Еуроодақ нарығына импорттауға арналған химиялық заттар мен олардың қоспаларының сапа деңгейін бағалаудың толық рәсімінен өтті.
Кәсіпорынның қоғаммен байланыс қызметінің мәліметіне сүйенсек, REACH регламентіне сәйкес, Еуроодақта жылына 1 тоннадан астам мөлшерде өндірілетін немесе импортталатын кез келген химиялық зат тіркеуге жатады. Ал REACH сертификаты – еуроаймақ елдеріне бензин шығаратын қазақстандық кәсіпорынның экспорттық мүмкіндігін дамытудағы маңызды қадам.
Мұндай сертификат былтырғы сәуірде Атырау мұнай өңдеу зауытының өндірісіндегі хош иісті көмірсутектер – бензол және параксилол өнімдері үшін де берілген еді. Ал қазақстандық жанармай еуропалық сапа стандарттарына сәйкестігі расталған үшінші өнім болып отыр. Енді REACH сертификаты Атырауда шығарылған жанармайдың Еуроодақ елдерінің нарығына шығуына даңғыл жол ашады.
Атырау облысы
Дереккөз: egemen.kz
