Бүгін кәсіпқой боксшы Қанат Ислам бастаған «QAZAQ promotions» промоутерлік ұйымы «Ел-Несібе» Қайырымдылық қоры» қоғамдық қоры арқылы Нұрсұлтан қаласында 8 баласы бар жалғызбасты анаға 2 бөлмелі пәтер сыйлады.
Промоутерлік ұйымның мәліметінше, пәтер Нұр-Сұлтан қаласының оң жағалауында Сарыарқа ауданында орналасқан. Қанат Ислам ҚР Президенті Қасым-Жомарт Тоқаевтың тікелей қолдауымен 5 шілдеде Алматыда өткен «Қанат Исламмен бокс кеші» атты шарадан жиналған қаржының бір бөлігіне көпбалалы отбасыға баспана алып беруді ұйғарған.
Баспана көпбалалы отбасыға ыңғайлы болуы үшін іргесінде орналасқан мектеп және балабақшаның жақындығына орай арнайы таңдалды. Сондай-ақ, пәтердің іші тұрмысқа қажетті барлық техникалармен, төсек-орынмен толық жабдықталған.
Пәтердің кілтін жалғызбасты ана Гүлшат Баяділоваға қазақ кәсіпқой боксының жарық жұлдызы, WBO Inter-Continental чемпионы Қанат Ислам өзі тапсырды. Гүлшат Баяділова – «Күміс алқа» иегері, 8 баланы өмірге әкеліп, ер жеткізген. Баласының алды тұрмыс құрып, жеке отбасы болып отыр. Екінші баласы науқас, қаржының тапшылығынан медициналық көмек уақытылы көрсетілмегендіктен, нақты диагнозы анықталмаған. Үшінші баласы колледж студенті, ал қалған 5 баласы мектеп оқушылары. Осы уақытқа дейін жер үйдің аядай бір бөлмесін паналап келген. «Клуб добряков» көмек ретінде, холодильник, газ плитасын, төсек, диван әкеліп берген. Оған дейін жерге жатып жүрген екен. Баспананың зардабын тартып келген жанұя жағдайы туралы білген «Ел-Несібе» Қайырымдылық қоры» қоғамдық қорының өкілдері жан-жақтан көмек сұрастыра жүріп, қазақтың жомарт пейілді жаужүрек ұлы Қанат Исламға осы жайды жеткізеді.
Jebeu.kz
