Елімізде "7-20-25" бағдарламасымен ипотека алу үшін басыңызда баспана болмауы тиіс. Ұлттық банк төрағасы осы су жаңа бағдарламамен қалай пәтер алу керектігін түсіндіріп берді. Данияр Ақышевтың айтуынша, ең әуелі үй алғысы келетіндердің тұрақты жұмысы, жоғары жалақысы болуы керек. Қазір мемлекеттік бағдарламамен несие бере алатын сенімді банктер іріктеліп жатыр. Ал, үйлі болудың тағы қандай талаптары бар? Шаршы метр құны қанша болады? Бұл мәселені КТК журналистері анықтап көріпті.
Әуелі үйлі болуы үшін адамдар 4 шартты орындауы тиіс. Әрқайсына жеке-жеке тоқталған Ақышевтың айтуынша, алдымен азаматтар сатып алғысы келетін баспананы таңдайды. Кейін қажетті құжаттарды жинап, ипотека рәсімдеу үшін банкке барады. Бірақ, қай банк және қандай құжаттар жинауы керектігі жақында белгілі болады.
"Қазір қаржылық жағдайы тұрақты, сенімді банктерді іріктеп жатырмыз. Шамамен 10 банк мемлекеттік бағдарлама бойынша ипотека беретін болады. Ал, баспананың құны Астана, Алматы және Ақтау қалалары үшін 25 миллион теңгеден аспайды. Қалған өңірлерде жоғарғы баға 15 миллион теңге болады", - дейді Ақышев.
Бірақ, шаршы метрге қол жеткізу үшін азаматтардың басында басқа баспанасы болмауы керек. Әрі ипотеканы тоқтатпай төлеу үшін тұрақты жұмысы, жоғары жалақысы болуы да шарт. Егер осы талаптар орындалмаса тұрғындар "7-20-25" бағдарламасына қатыса алмайды.
Мәселен, құны 12 миллион теңге тұратын пәтерді сатып алғыңыз келеді делік. Ол үшін алдымен үй бағасының 20 пайызы, яғни 2 миллион 400 мың теңгені төлейсіз. Қалған сомма - 9 миллион 600 мың теңге. Оны банк 7 пайызбен 25 жылға несиеге береді.
Сонда ай сайынғы төлеміңіз 68 мың теңгенің төңірегінде. Сонда жаңа бағдарламамен 12 миллионға шаршы метр алу үшін жалақыңыз шамамен 130 мың теңге болуы тиіс. Енді осы айдың соңына дейін "7-20-25"-тің барлық тетіктері заң жүзінде бекітілуі тиіс. Кейін қаржы ұйымдары екінші жартыжылдық, яғни шілде айынан бастап ипотека бере бастайды.
Дереккөз: kaz.tengrinews.kz
